27 ЙИЛЛИК ҚАЙҒУ: ХЎЖАЛИ ВОҚЕАСИ

Тошкентдаги Ҳайдар Алиев номидаги Озарбайжон маданият марказида Хўжали фожиасининг 27 йиллигига бағишланган “Реквием” – хотира концерти бўлиб ўтди. Унда республикамиздаги хорижий давлатлар дипломатик корпуси, фан ва маданият арбоблари, таниқли санъат усталари, оммавий ахборот воситалари вакиллари иштирок этди.

Маданият маркази фойесида ташкил этилган фото ва китоблар кўргазмасида 1992 йилнинг 25 февраль кунидан 26 февралга ўтар кечаси содир этилган зиддиятли воқеалар тафсилотлари кўрсатилди.

Озарбайжон Республикасининг Ўзбекистон Республикасидаги Фавқулодда ва мухтор элчиси Гусейн Гулиев ўз сўзида Хўжали воқеаси озарбайжон халқининг хотирасидаги энг қайғули фожеа сифатида қолганлигини таъкидлади.

Элчининг қайд этишича, “Хўжалида ўша даврда яшаётган 7 мингдан зиёд тинч аҳолига нисбатан геноцид ҳаракати содир этилган эди. Маҳаллий аҳолининг 4 минг нафари мудҳиш воқеалар исканжасидан қутилиш мақсадида ўз уйларини ташлаб чиқиб кетишган эди. Қолган аҳоли вакилларидан 1000дан ортиғи турли даражада яраланган ва 613 киши нобуд бўлган. 1275 нафар киши тутқинликда қолган. Орадан вақт ўтиб, 2012 йил 30 январь куни 57 та давлатни бирлаштирган Ислом ҳамкорлик ташкилоти Хўжали геноцидини расмий тан олди. Уни Хатин, Хиросима, Нагасаки, Сонгми ва Холокост каби ХХ асрнинг машъум фожиалари қаторига қўйган. Айни пайтда Хўжали геноцидини 12 та давлат, АҚШнинг 21 та штати тан олган”.

Тадбирда Хўжали қурбонларини йиғилганлар бир дақиқалик сукут сақлаш билан ёд этдилар.

Хотира концерти Ҳайдар Алиев номидаги Озарбайжон миллий маданий маркази, Озарбайжоннинг Ўзбекистондаги элчихонаси ва Ўзбекистон-Озарбайжон дўстлик жамияти томонидан ташкил этилди. Реквием дастури профессор Феруза Абдураҳимова раҳбарлигидаги “Сўғдиёна” ўзбек давлат миллий чолғулари камер оркестри томонидан ижро этилди.